Помнім тых, хто здабыў нам перамогу
<iframe align="middle" allowfullscreen="true" frameborder="1" height="500" mozallowfullscreen="true" scrolling="yes" src="https://docs.google.com/presentation/d/e/2PACX-1vRNVXuSPIg3HjKUpRFKIVFi6ROpJNbWeFK5HzKvTP9iZpgPIW3vPv_o3l8gXMwxuwljtxgWRAlalAFQ/embed?start=true&loop=true&delayms=3000" webkitallowfullscreen="true" width="700"></iframe>
Вялікая Перамога!
Як чакалі яе ў тым далёкім сорак пятым… Вось ужо 75-ы раз мы будзем вітаць яе на нашай зямліцы-пакутніцы. Сустрэлі Перамогу, але адгалоскі вайны чуваць і сёння. Гэта тэма не перастае хваляваць людзей, верадзіць старыя раны і душу болем сэрца.
Перамога –сімвал нацыянальнага адзінства, вайсковай славы і доблесці. Абавязак кожнага грамадзяніна нашай краіны памятаць подзвігі дзядоў і прадзедаў.
У знак пашаны і ўдзячнасці нашым абаронцам у дзяржаўнай установе адукацыі “Граўжышкоўскі яслі-сад-базавая школа” прайшла акцыя “Сад Перамогі”. Падхапілі прапанову ўсе мясцовыя грамадскія арганізацыі: выканаўчы камітэт, лясніцтва, культура, ахова здароўя, пагранічны пост “Клявіца”.
“Сад Перамогі” вырашылі пасадзіць каля школы, таму што ў нашых руках будучае не толькі нас саміх, але і нашых дзяцей і ўсіх наступных пакаленняў. Усе арганізацыйныя пытанні ўзяла на сябе дырэктар школы Сянкевіч Валянціна Паўлаўна. Было выбрана месца для пасадкі, закуплены сажанцы, зроблены таблічкі.
9 красавіка каля школы было мнагалюдна і ўрачыста. Сюды завіталі прадстаўнікі ад кожнай мясцовай арганізацыі. Далі старт акцыі дырэктар школы Сянкевіч В.П. і старшыня выканаўчага камітэта Чаплінскі П.В. Хочацца адзначыць актыўнасць моладзі, якая прыняла ўдзел у акцыі: пагранічнікі, работнікі аховы здароўя, настаўнікі.Кожнае дрэўца яны садзілі з любоўю.
Цудоўны атрымаўся сад, а маладыя яблынькі − памяць пра тых, хто здабыў нам перамогу і шчаслівае жыццё. Перамогу, якая сплецена з лёсаў мільёнаў людзей, і ў нашых сэрцах, і сэрцах нашчадкаў будзе гарэць агонь памяці.
Булкевіч Таццяна Браніславаўна
